८ बैशाख २०८१, शनिबार 1713652297
विश्व

उत्तर कोरियाद्वारा क्षेप्यास्त्र परीक्षण

काठमाडौं- उत्तर कोरियाले व्यालिस्टिक मिसाइल परीक्षण गरेको दक्षिण कोरियाको सेनाले जनाएको छ ।

मुलुकको उत्तर पूर्वी क्षेत्रबाट उत्तर कोरियाले क्षेप्यास्त्र परीक्षण गरेको जनाएपनि दक्षिण कोरियाली सेनाले यसबारे विस्तृत विवरण उपलब्ध गराएको छैन ।उत्तर कोरियाली क्षेप्यास्त्र परीक्षणको जापानले पनि पुष्टि गरेको अन्तर्राष्ट्रिय सञ्चार माध्यमले जनाएका छन् । समाचार संस्था एपीका अनुसार जापानको रक्षा मन्त्रालयले उत्तर कोरियाले सम्भावित ब्यालेस्टिक मिसाइल प्रक्षेपण गरेको जनाएको हो ।

आणविक परीक्षणलाई लिएर उत्तर कोरियामाथि विभिन्न प्रतिबन्धहरू लागिरहेका बेला प्योङयाङको पछिल्लो परीक्षण सार्वजनिक भएको हो । उत्तर कोरियाले आणविक परीक्षणको तयारी गरेको दक्षिण कोरिया र अमेरिकाले आरोप लगाउँदै आएका छन् ।

उत्तर कोरियाली नेता किम जोङ उनले प्योङयाङको आणविक हतियारलाई ‘सबैभन्दा छिटो गतिमा’ बढाउने प्रतिबद्धता जनाएको एक सातापछि उत्तरले व्यालिस्टिक मिसाइल प्रहार गरेको जनाएको हो ।

यो वर्ष मात्र उत्तर कोरियाले यो समेत १४ पटक क्षेप्यास्त्र परीक्षण गरिसकेको जनाइएको छ ।