२०७९ आश्विन १९ बुधबार 1665015155
राजनीति

बोरिस जोनसन भारत गुजरातमा

काठमाडौं– दुई दिने भारत भ्रमणका लागि बेलायती प्रधानमन्त्री बोरिस जोनसन गुजरात पुगेका छन् । भारत भ्रमणका क्रममा उनी बेलायतबाट सीधै गुजरातको अहमदाबाद शहरमा रहेको विमानस्थलमा अवतरण गरेको भारतीय समाचार संस्था एएनआईले जनाएको छ ।

गुजरातमा रहँदा उनले त्यहाँका व्यापारिक प्रतिनिधिहरू लगायतसँग द्विपक्षीय हित, व्यापारिक एवम् जनस्तरको सम्बन्धबारे छलफल गर्ने छन् ।
कुनै पनि बेलायती प्रधानमन्त्रीको यो पहिलो गुजरात भ्रमण हो । बेलायतमा बसोबास गर्ने भारतीय मूलका झण्डै आधा जनसंख्या गुजरातबाट त्यहाँ पुगेको एएनआईले जनाएको छ ।

भारतको पाचौँ ठूलो राज्य गुजरातको भ्रमण सकेर प्रधानमन्त्री जोनसन राजधानी नयाँ दिल्ली जाने कार्यक्रम छ । शुक्रबार बिहानै जोनसनले भारतको राष्ट्रपति भवनको भ्रमण गर्ने र महात्मा गान्धीको समाधिमा माल्यार्पण गर्ने कार्यक्रम रहेको एएनआईले जनाएको छ ।

दिल्लीमा रहँदा उनले भारतीय समकक्षी नरेन्द्र मोदी, विदेशमन्त्री एस जयशंकर लगायतसँग उच्चस्तरीय वार्ता गर्नेछन् ।

उनको भ्रमणका क्रममा भारत र बेलायतबीच स्वतन्त्र व्यापार सम्झौता, इण्डो प्यासिफिक क्षेत्रमा सहकार्य अभिवृद्धि, रक्षा सम्बन्ध, आर्थिक एवम् कूटनीतिक सहकार्य, लगायतका विषय प्राथमिकतामा रहेको एएनआईले जनाएको छ ।

यसबाहेक रुसले युक्रेनमाथि जारी राखेको आक्रमणका विषयमा पनि बोरिस जोनसनले भारतीय नेतृत्वसँग छलफल गर्ने जनाइएको छ ।