सिरहा- पूर्वपश्चिम राजमार्गअन्तर्गत सिराहाको गोलबजार नगरपालिका-९ चोहर्वामा यात्रुबाहक बस दुर्घटना हुँदा दुईजनाको मृत्यु भएको छ ।
मृत्यु हुनेमा सिराहाको मिर्चैया नगरपालिका– २ का ४० वर्षीय राजकुमार सदा र जनकपुरधाम उपमहानगरपालिका– २० का ५० वर्षीय अनिलकुमार झा रहेका इलाका प्रहरी कार्यालय मिर्चैयाले जनाएको छ ।
बसमा सवार अन्य २५ जना घाइते भएका छन् । जसमध्ये २ जनाको मिर्चैया र २३ जनाको गोलबजारका विभिन्न स्वास्थ्य संस्थामा उपचार भइरहेको इलाका प्रहरी कार्यालय मिर्चैयाका प्रमुख डिएसपी जितेन्द्र बस्नेतले जानकारी दिनुभयो ।
सप्तरीको राजविराजबाट जनकपुरतर्फ जाँदै गरेको ना ४ ख ७१८७ नम्बरको यात्रुबाहक बस आइतबार दिउँसो अनियन्त्रित भएर चोहर्वामा गोलबजार नगरपालिका– ९ मा रहेको मारुती सिमेन्ट उद्योगनजिकै दुर्घटनामा परेको प्रहरीले जनाएको छ ।
बस अनियन्त्रित भएर राजमार्गदेखि छेउमा पल्टिएको थियो । बसचालकका अनुसार स्प्रिङ पत्ता भाँचिएर बस अनियन्त्रित भएको हो ।
