काठमाडौं। नेकपा एमालेको जनसङ्गठन नेपाल बुद्धिजीवी परिषद्ले पिछडिएको बस्ती तथा दुर्गम बस्तीमा स्वास्थ्य सेवा प्रवाह गर्ने विषयमा प्रदेश सरकारलाई सुझाव दिने भएको छ । परिषद्का अध्यक्ष तथा प्रदेश सांसद डा.दिनेशचन्द्र देवकोटाले परिषद्ले आधारभूत स्वास्थ्य सेवा कसरी प्रवाह गर्ने भन्ने प्रस्ट आधार तयार गरेर नीति निर्माण गर्न सरकारलाई सुझाव दिने बताए ।
बुद्धिजीवी परिषद्का स्वास्थ विभागका सदस्य तथा विभिन्न विशेषज्ञ चिकित्सकहरूसँग छलफल गरेर परिषद्ले जनतालाई निःशुल्क र आधारभूत सेवा दिन सकिने आधार सहितको सुझाव दिने अध्यक्ष देवकोटाले बताए ।
उनले भने, ‘स्वास्थ्य सम्बन्धी मौलिक हक कार्यान्वयन गर्ने विषयलाई प्राथमिकता दिनुपर्छ। जनतालाई स्वास्थ्य परीक्षण, निःशुल्क आधारभूत स्वास्थ्य सेवा, जटिल रोगको निःशुल्क उपचार, बिमा, स्वास्थ्य पूर्वाधार र जनशक्तिको समष्टिगत व्यवस्था कसरी गर्ने भन्ने बारेमा धारणा बनाएर अघि बढ्नुपर्छ। कार्यान्वयनको लागि जोड दिनुपर्छ।’ यसका लागि हामी सरकारलाई नीति निर्माण गर्न सुझाव दिँदै छौं ।
प्रदेश सरकारलाई सुझाव दिनुभन्दा पहिले परिषद्ले देशका विभिन्न स्थानमा गएर निःशुल्क स्वास्थ्योपचार गर्ने, जनचेतनामूलक काम गर्ने, चेपाङ बस्ती, राउटे बस्तीलगायत पिछडिएका बस्ती र दुर्गम बस्तीमा सेवा दिने र त्यहाँ भएको समस्या र समाधानको उपायसहित प्रतिवेदन बनाएर सरकारलाई बुझाउने डा.देवकोटाले बताए ।
परिषद्ले यसका लागि पहिलो छलफल गरिसकेको छ । परिषद्ले पहिलो चरणमा बागमती प्रदेशका स्वास्थ्य मन्त्री रामेश्वर श्रेष्ठसँग छलफल गरेको छ ।
परिषद्ले मन्त्रीसँगको छलफलमा बागमती स्वास्थ्य नीति, सार्वजनिक स्वास्थ्य विशेषज्ञ, उपचारात्मक व्यवस्था, पोषण, फार्मेसी, स्वास्थ्य हेरचाह व्यवस्थापन, नसर्ने रोग, तीन महिनाको कार्यक्रम, प्रत्येक महिनाको ७ गतेसम्म स्व–मूल्याङ्कन, तत्काल सेवा वितरण, परिभाषित गर्ने नीति, अनुसन्धान शाखा, औषधि प्रशासन, छ महिनाको समय, तत्काल कार्यान्वयन गर्ने नीति, फोहोर व्यवस्थापन र जनशक्ति व्यवस्थापनलगायत विषयमा छलफल गरेको नेपाल बुद्धिजीवी परिषद्का स्वास्थ विभाग संयोजक तथा किष्ट मेडिकल कलेजका प्रमुख प्रशासकिय अधिकृत अक्षयप्रसाद गौतमले बताए ।
नेकपा एमालेले चुनावमा घोषणा गरेको घोषणापत्र अनुसार स्वस्थ क्षेत्रमा कसरी अघि बढ्ने भन्नेबारेमा परिषद्ले छलफल गरेको छ। घोषणापत्रमा ‘निरोगी नेपाल र स्वस्थ्य नेपाली’ नारा दिएको एमालेले पूर्वाधार, जनशक्ति, वित्तीय व्यवस्था र स्वास्थ्य चेतनाको विकासद्वारा स्वास्थ्य सम्बन्धी मौलिक हकको कार्यान्वयन र निरोगी नेपाल निर्माण गर्ने’ कुरामा जोड दिएको थियो।
६० हजार सदस्य रहेको परिषद्ले स्वास्थ्य क्षेत्रमा सुधार गर्नुपर्ने नीतिबारे धारणा बनाएर सरकारलाई सुझाव दिनेछ। डा.देवकोटा राष्ट्रिय योजना आयोगका पूर्वउपाध्यक्षसमेत हुन् ।
बुद्धिजीवी परिषद् बौद्धिक सङ्गठनको सञ्जाल भएकाले यसको कामले देशव्यापी प्रभाव पार्ने गौमतले बताए। परिषद्ले देशका विभिन्न ठाउँमा गएर आवश्यकता अनुसार स्वास्थ्य सेवा दिने गौतमले बताए । परिषद्ले निःशुल्क आँखाजाँज, चस्मा वितरणलगायतका काममा समेत जोड दिने उनको भनाइ थियो।
